اليوم في حديث ومغزل مع سناء الزعيم خصصنا هاد الحصة الصباحية لشهيوات مختلفة للشوفلور وطرق تحضيره من طرف مجموعة من المستمعات اللي متعونا و استمتعنا بسماع صوتهم لأول مرة و هذه بعض الشهيوات:
* رشيدة من أكادير : الشوفلور مقلي // نغليو الماء ثم نسلقو الشوفلور نصف سلقة.
أصفر بيضة نطربوه مع الكامون و الملح و الابزار ثم نرقدو فيه أطراف الشوفلور ثم ندوزوهم في الطحين و نقليوه وممكن مصاحبته مع أطباق متنوعة كالسمك.
* رشيدة من كلموس : الشوفلور في الفرن // نسلقو الشوفلور نصف سلقة مع الثومة و ورقة سيدنا موسى و شوية الملح ، ثم نصفيوه و نوضعوه في مول و نضيفو ليه البيشاميل و نرشو بالفرماج محكوك و ندخلوه للفرن حتى يتحمر و نقدموه بالصحة و الراحة.
* أم فهد من البيضاء : الشوفلور مشرمل // نسلقو الشوفلور نصف سلقة ثم نجمعو شرمولة ديال الحوت ونوضعو فيها الشوفلور ثم نطربو 2 بيضات و نغمسو فيهم أطراف الشوفلور و ممكن نقليوه أو نحمروه في الفرن و نقدموه بالصحة و الراحة.
* غزلان من فرنسا : طاجين الشوفلور // نطيبو اللحم كيف العادة مع العطرية اللي كتستعمل كل امرأة و نخليوه يتقلى مزيان ، وفي الأخير نضيفو الشوفلور لأنه ما كيحتاجش للطبخ بزاف و ندردرو على الوجه الربيع و الحامض مصير و شوية الزيت بلدية و نخليو الطاجين يتشرب لينا مزيان و نقدموه بالصحة و الراحة.
* صالحة من الرباط: الشوفلور مرقد و محمض// نعقمو قراعي ديال الزجاج .
الشوفلور مقطع أو على شكل شجيرات و كل قرعة نعمروها بالماء للنصف ثم نعصرو فيها حامضة و شوية الملح و الخل حسب الاختيار و الزيت البلدية و نشدوهم مزيان و نوضعوهم في مكان بارد مافيهش الضوء وممكن نخليوهم لمدة أسبوع كما يمكن استعمال نفس الوصفة لترقاد أي نوع من الخضر.