اليوم في حديث ومغزل مع سناء الزعيم قدمو لينا المستمعات اللي سعدونا بسماع صوتهم لأول مرة وتحفونا بمجموعة من الوصفات للحامض و بأفكار مختلفة وهذه بعض هذه الشهيوات:
* ألما من مدينة وجدة : طاجين ديال الدجاج مقلي مع الحامض // 2 دجاجات متوسطات الحجم ، معلقة سكينجبير ، زعفران ، بصلة ، ضامة البنة ديال الدجاج ، ثومة ، 2معالق كبار من القزبر و المعدنوس ، نصف كأس من زيت العود وزيت المائدة ، ابزار ، زيتون أحمر و حامضة مصيرة و مقطعة .
كنشرملو الدجاج مزيان بالعطرية ثم نرويو بالماء و نخليو الدجاج يطيب لينا ثم نضيفو الزيتون و الحامض و نخليوه يتقلى مزيان ثم نقدموه بالصحة و الراحة.
* زينب من البيضاء : طارطا ديال الحامض // 200 غرام من الدقيق ، 100 غرام زبدة ، 30 غرام سكر كلاصي كنجمعو العجينة بأصفر بيضة و الا اقتضى الأمر ممكن نضيفو الحليب حتى تجمع لينا العجين و نخليوها ترتاح نصف ساعة في الثلاجة ثم ندلكوها و نفرشوها في مول الطورطات كيدخل للفرن .
الكريمة : حامضة محكوكة و معصرة ، 3 معالق كبار سنيدة ، 2 كيسان و نصف ديال الحليب ، 2معالق مايزينا ، 2أصفر بيضة ، نحركو الكل حتى يتجانسو و تعقاد الكريمة ، ثم جانبا ناخذو 4 أبيض بيض و نطلعوهم مزيان بحال الثلج ثم نخلطوهم مع الكريمة الأولى و نعمرو بهم العجينة و ندخلوها للفرن حتى يتحمر الوجه .
* سعاد من فاس : كريمة بالحامض // نصف لتر من الحامض معصر ، زلافة كبيرة من سنيدة ، 3 أصفر بيض ، 2فانيلا و 2 معالق ديال النشا.
في كاسرونة نسخنو الحامض و نخلطو باقي المكونات في اناء اخر و نبداو نضيفو ليهم عصير الحامض اللي دفيناه ونرجعوهم في كاسرونة فوق عافية مهيلة مع التخلاط حتى تعقاد ثم ندخلوها للثلاجة و هاهي الكريمة موجودة .
وممكن ندهنو بها الكيكة ثم نزينو بخيوط الشكلاط و حبات اللوز مهرمش، كيف ممكن نفتحو الكيكة من الوسط و نعمروها بهاد الكريمة ثم نزينو الوجه بالشكلاط و الكركاع كيفما ممكن ندهنو بها وجه القريشلات أو الكريصات .